جروحي تنزف احزاني

الجزء الثاني



فتحت عينها من نومها المتقطع ...على صوت الظحك اللي تسمع برى غرفها كانوا بنات عمها وهم يظحكون مع امهم وابوهم....وتذكرت الايام الحلوه..ايام ما كانت هي دلوعة بيتهم...كانت طلباتها اوامر وتذكرت اخوها بندراللي كانت تختلف معاه على كل شي وكان يحب يعصبها باي طريقه وكانت لما تعصب تسمع ضحك ابوه ولما تسأله وهي زعلانه "ليش يبه تضحك؟؟"
يرد عليه" لانك حلوه حتى وانتي معصبه"..
تذكرت امها الحنون اللي كانت دوم تغمرها بنصائحها وكأنها كانت عارفه انها ماراح تكمل معاها مسيرة حياتها...
-"بسمه انتي تبكين"
ماحست لما دخل عبد العزيز...
بسمه وهي تمسح دموعها :"ها...لا بس عيوني ما ادري اش فيها... بغيت شي"
عبد العزيز:"امي قالت لي اناديك"
قامت بسرعه وراحت غسلت وجهها...ودخلت الصاله
بسمه:"هلا مرة عمي بغيتي شي"
ام عبد العزيز بعصبيه: "كل هذا نوم"
بسمه:" ما نمت البارح الامتأخره و...."
ام عبدالعزيز مقاطعه:" ايه ماعلينا ...اشلونها ام مازن"
بسمه :" تسلم عليك ...شفتها اول مادخلت وعقب انشغلت مع امل في الدروس اللي فاتتها "
رمي عمها الجريده اللي كان كان يقرها وقاطعها بعصبيه :"ليه ماتذاكرين لبنت عمك بدل مانتي مسويه نفسك مدرس خصوصي"
هند:"لا يبه واللي يعافيك انا مااحتاج هالاشكال"
ام عبد العزيز تواصل تحقيقها: "كان عندها احد من خواتها"
بسمه :"لا وانا عندهم ماشفت احد"
هدى :" ياكرهي لاختها ريم قمه في الغرور هي وبنت خالتها عبيردايم اشوفهم في الجامعه ...ما اقول الا مالت عليهم"
بسمه في خاطرها عندك وعندهم خير ...
ام عبد العزيز :" اقول قومي شوفي عبد العزيز ان كان طاع يذاكر..بدل ماانتي قاعد متنحه كذا"

##########################


بعد الظهر وهي في بيت اهلها..جالسه مع امها وابوها دخل خالد ..
خالد :"عاد اليوم مااحد بيعطينا وجه بعد ماجات الغاليه"
بدريه :"هههههههه خل عنك الغيره انت داري انه ما احد بغلاك عند امي وابوي"
ابتسم وهو متجه لها:"ايه متأكد بس الواحد احيانا يحب يشوف غلاه"
بدريه :" ههههه تصدق انك طماع..... الا ما كن ساره تأخرت هي قالت لي بتجي الظهر"
ساره اختهم اللي اصغر من بدريه واكبرمن خالد متزوجه من ولد عمها ناصر من عشر سنين تأخرت في الحمل حملت بعد ست سنين وجابت توأم (زياد وريناد)عمرهم ثلاث سنين...
ام خالدوهي طالعه:" بتجي العصر لان في بيت عمك ضيوف على الغدا. حتى ابوك وخالد بيروحون"
بعد ماراحت ام خالد...
ابو خالد : اقول بدريه ماكلمتي خالد عن الموضوع اللي قلت لك عليه"
بدريه وهي تناظر خالد:"كلمته يبه وقال بيفكر"
ابو خالد :" الى متى بتضل تفكرياخالد"
خالد:"يابوي انا ابغى بنت خالتي"
ابوخالد:"ياولدي ابو محمد بعد ما فسخ الخطبه يبيني اروح له واترجاه بما انك ولدي الوحيد.... بعدين نسيت انها الحين مخطوبه و نسيت اللي سواه ولده في بنت عمك "
خالد:"مانسيت يبه بس ياخوفي ان العنود ومحمد يرجعون لبعض بعد ماانحرم انا من عبير"
ابو خالد:"اذا ترضى لابوك المذله مشينا اليوم العصر لابومحمد" "
خالد:"ما عاش من يذلك"
ابو خالد:"واذا تبغى شوري عند ابو محمد مالنا نصيب خلنا ندور لك بنت الحلال اللي تسعدك"
تنهدابو خالد:"ياخالد نفسي اشوف عياله قبل لا اموت"
بدريه:" الله يعطيك طولة العمر يبه وتفرح بعياله"
خالد:" الى هالدرجه مسبب لكم مأساه"
ابو خالد: "ياخالد انت ولدي الوحيد....فلا تستكثر علي اني افرح بك واشوف عيالك
خالد:يابوي ماادري اش اقول لك"
ابوخالد:"طلبتك ياولدي فرح قلبي الله يفرح قلبك"
خالد اتجه لابوه وحبه على راسه:"انت ما تطلب يبه انت تأمر....خلاص يابدريه ابدي مهمتك في البحث عن بنت الحلال"
بدريه:"يازينها من مهمه ياخوي"
ام خالد وهي داخله وما سمعت وش يدور:"اقول


##############################

في المغرب في بيت ابوخالد كانوا قاعدين في الصاله...
ام محمد وهي توجه كلامها لبدريه :"وينك يابنيتي قطعتينا مانشوفك"
بدريه :"تدرين بعد ياخالتي ..مشاغل البيت والعيال"
ام محمد :" هذي ساره حتى بعد التوم وتسأل وتزور"
عبير:"حتى المناسبات ماتحضرينها
بدريه :"عاد المناسبات ماافضى لها... تصدقين عساني بس اقدر احضر خطوبة خالد"
كل الانظار اتجهت لعبير عشان يعرفون ردة فعلها...اللي بان عليها هي وامها الصدمه الشديده...
ام محمد : "اشوف يام خالد خطبتوا لخالد وما قلتي "
ام خالد :"لا والله ياوخيتي ما صار شي توه هو وافق وطلب من بدريه تدور له"
عبير وهي تحاول تبان طبيعيه : "اش معنى بدريه؟؟"
بدريه تبي تقهرها:"والله عاد اخوي يثق في ذوقي ..الا ياخالتي متى خطوبة عبير"
ام محمد بضيق :" ما تحدد للحين...الا انتي فيه احد في بالك؟؟"
بدريه :" بصرااحه لا "
ساره وريم على الرغم من حبهم لاخوهم مستحيل يرشحون احد للزواج من اخوهم...
من حبهم لعبير وكانوا متأملين عودتهم لبعض ....


###############################

كانت في غرفتها ...ماكان لها نفس في الاكل ...وكيف يكون لها نفس عقب ما سمعت كل شي ...يالله كنت صابره على عمي واهله ومتحمله الطق والاهانات على امل الله يرزقني باابن الحلال يريحني من كل هذا ..آه من عمي اللي يبي يرميني هالرميه...
حطت راسها على المخده ومو قادره تتحكم في دموعها ....... سمعت صوت آذان صلاة العصر رددت الاذان مع المؤذن وقامت تتوضا وتصلي وتدعي ربها ...يفرج كربتها....
##########################

دخلت البيت وهي معصبه ورمت عباتها وشنطتها على الكنبه.....
-"شفتي يمه خالد بيخطب"
ام محمد :"يابنتي استهدي بالله ما ظني خالد يسويها"
عبير :"بموت يمه لو خالد يتزوج"
ام محمد:"انتي الغلطانه لو ما طاوعتي ابوك ماكان فسخ الخطبه"
عبير:"ابوي بغى يذل ابوه وعمه وكنت متاكده ان خالدمستحيل يتخلى عني بهالسهوله"
ام محمد:"اذا كان خالد يحبك مره فهو يدور رضى ابوه الف مره"
عبير:"لا مستحيل......خالد يكون لغيري"
ام عبير:"هو اكيد ماوافق الا لما قالوا له انك مخطوبه"
عبير:"اي خطبه المفروض انه هو اول واحد يدري اني مستحبل اوافق على غيره"
ام عبير:"اش يدريه واحنا قلنا لهم انك انخطبتي"
عبيروهي معصبه:"كل اللي صار بسبب محمد"
قاطعتا امها بعصبيه :عبير كل شي صااار برضاك وما احد غصبك...انا الحين شايله هم اخوك اللي اختفى من بعد ماطلق مرته"
عبير:"انتي تدرين انه مسافر وكل شوي يتصل زميله يطمنا عليه"
ام محمد:"بس هو ليش مايتصل"
عبير بلامباله:"ماادري عنه "

ام محمد هي اخت ام خالد الكبيره عيالها هم محمد وعمره 33سنه يشتغل في شركة ابوه....كان متزوج العنود بنت عم خالد ....وعبيروعمرها20سنه....عبيرفائقة الجمال وتبهر الكل....قمه في الغرور والتكبر وانانيه ماتهتم الافي نفسها....


يتبع في الجزء الثالث

اشرايك صح اللي ناويه اسويه ولا غلط...
عبد الله : "والله يابدريه ما ادري ....بس انتي موقفك صعب ....اخاف بدل ما تكحلينها تعمينها للأثنين..."
بدريه :" ياعبد الله بالنسبه لخالد عندي مطلق الحريه للاختيار وصدقني لو ما قلبه مشغول مستحيل كان يلاقي احسن من بسمه وابوي مستحيل يخطب عبيرلخالد مره ثانيه....اما بسمه ياتتزوج هالشايب اللي جابه لها عمها او خالد اللي بيكون مناسب لها من كل النواحي الا الحب الاول اللي مع الايام يقدر ينساه....وبعدين في خالد ميزه ثانيه
ان عمها مستحيل يرفضه ..".
عبد الله:"بس لا تنسين يابدريه ان بسمه من عايله بسيطه ويمكن هالشي يفرق مع اهلك.."
بدريه:"اهلي وخصوصا ابوي اهم شي تكون من اصل طيب..."
عبد الله:"فيه مشكله ثانيه البنت اكيد من**ره واتوقع تكون شخصيتها ضعيفه واخوك الافضل له وحده لها شخصيتها و..."
قاطعته بدريه وهي تفكر:"تصدق بسمه على رغم حياتها لما اشوفها في المدرسه وفي حفلة نهاية السنه استغرب كان الكل يعجب بقوة شخصيتها وحسن القائها بنت محبوبه من الجميع..."
عبد الله:"موغريبه تكون كذا وانتي ادرى بحياتها عند عمها.."
بدريه: "بس لا تنسى انها عاشت في بيت ابوها الله يرحمه حياه كريمه ويمكن هذا اللي معطيها القوه اللي تظهر بها احيانا"
عب الله:"بس ماتخافين اخوك يحطم هالقوه الباقيه عندها.."
بدريه:"وهذا اللي مخليني متردده"
عبد الله : "انا اقول اذا كنتي واثقه من اخوك ماراح يرفض ...شاوري البنت وشوفي ردها..."
بدريه وهي تفكر :" لازم ادور طريقه اخليها تجي بيتنا حتى اشاورها...."
عبد الله:"بس لا تخبين أي شي خصوصا انه كان خاطب ..."

******************************




*************************************

ام عبد العزيز وهي تكلم زوجها :"اليوم بنروحالعصر بيت ابو مازن بيجون اهلها وعزمتنا ..."
ابو عبد العزي**عد اهتمام : "الباب يفوت جمل ..."
هند : "يمه كلنا بنروح ..."
ام عبد العزيز : "لان بدريه مأكده علي تجون"
هند : "بس بسمه خليها تنثبر يمه في البيت ..."
ام عبد العزيز بحزم :"لا بتروح ...اش بيقولون اذا تركنها في البيت ...."
ام عبد العزيز يهمها كلام الناس وتحب تظهر قدامهم انها حنونه على بسمه ...




%%%%%%%%%%%%%%%%%%%




-"اقول صدق الاخبار الحلوه اللي سمعناها ..."
خالد بضيق : "لا تقول الخطوبه.... هم ما صدقوا قلت ايه..... ونشروا الاخبار تصدق انت الثاني اللي تسألني اليوم .."
فهد :"من الاول اللي سألك ..."
خالد بارتباك: "واحد من الشباب ...بس انت من قال لك ؟؟"
فهد : "اللي يسمعك يقول اني غريب ما كني ولد عمك ...بعدين اذا انت ماقلت لي اخبارك لازم انا ادورها من مصادر موثوقه بس اللي ما عرفته تعيسة الحظ اقصد سعيدة الحظ من تكون؟"
خالد :"تعيسه في عينك ..."
فهد : "ما قلت من المزيونه .."
خالد :" اقول احترم نفسك لا تقعد تتغزل في حرمتي اللي ما ادري للحين من هي ..."
فهد : "ههههه ايه اكيد قاعدين يدورن لك عروسه بمواصفات خاااصه .."
خالد : "أي مواصفات خاصه ...عقبها ما احد يملى العين ..."
فهد :"اقول خل عنك الحب الاول وخرابيطه وعيش حياتك ..."
خالد : "وانت يالحبيب متى بتعيش حياتك ..."
فهد وهو سرحان : "قريب ان شاء الله...خالد بغيت اقول لك شي بس متردد..."
خالد:"وليش تتردد من متى هالادب ما شاء الله"
فهد:"بصراحه العنود متلومه فيك وتقول اكيد اهي السبب في كل اللي صار..."
خالد:"لا العنود مالها دخل وبعدين ابو محمد هو اللي فسخ الخطبه وابوي زعل وتعرف الوالد اذا زعل..."
فهد:"يااخي ما تدري يمكن في الامر خيره..."
خالد:" يمكن....لا اشلونها العنود عقب ما طلقها محمد..."
فهد يتنهد:" حالتها حاله...سبحان الله عقب سنين من الحب والعشره الطيبه يتغير عليها..."
خالد:"تصدق حتى انا احس محمد له فتره متغير بس ماادري اش السبب..."

فهد هو ولد عم خالد الكبير (عبد الرحمن ) عياله هم فيصل 38سنه متزوج
العنود 34سنه واخيرا فهد عمره 28سنه
فهد يعتبر هو صديق فيصل الروح بالروح واقرب عيال عمه له...


كانوا قاعدين في بيت بدريه الحريم سوااالف وضحك والبنات الجو متكهرب بينهم ...
بسبب الغرور اللي في ريم اللي تحس انه قاعده مع ناس مو من مستواها....
اما امل وبسمه كانوا منبسطين مع بعض رغم الحزن اللي تحاول تخفيه بسمه في قلبها...
ام عبد العزيز : "كيف الجامعه معك ياريم ..."
ريم بعدم اهتمام : "ماشي الحال ....يالله ملل في بيتك يابدريه ...لو مجتمعين في بيتنا ماكان حسيت بملل...."
بسمه : "لو كان في بيتكم ماكان شفناكم ..."
ريم :" وهذ هو المطلوب...."
استحت بسمه ونزلت راسها... بنات عمه انبسطوا على رد ريم ..انقهرت امل من خالتها : "والله احنا ما تحلى لنا القعده الا في بيتنا ( وهي تنا ظربسمه ) ولا تحلى الا مع حبايبنا"
رهف :" وبعدين لو سمحتي لا تغلطين على بسمه "
بسمه حبت تلطف الجو: "اشلونك مع التؤم ياساره"
ساره :"متعبين (وهي تبتسم ) بس يازينه من تعب"
بسمه :"ياحلوهم ...بالذات ريناد تجنن اموت فيها "
ساره : "ايه اكيد طالعه قمر على امها"
ريم : "الا قولي طالعه على خالتها ريم "

ام خالد :" اشلون سحر ياام عبد العزيز ماجاتكم قريب من جده "
ام عبد العزيز : "طيبه الله يسلمك بتجي عقب الامتحانات"
ام خالد : "ايه هانت مابقى الاشهرين ...سلمي عليها اذا اتصلت "
ام عبد العزيز : "الله يسلمك"
بدريه :"عن اذنكم يمه انتي وام عبد العزيزانا بروح المطبخ ...(التفتت على البنات) ...احد يقوم يساعدني .."
ما حبت تحدد احد وتمنت اللي في بالها يصير ..
بسمه (وهي قايمه )"انا بروح معك .."
رهف : "حتى انا يمه بساعدك"
بدريه : "انتي اطلعي شوفي اخوك محمد اذا صحى من النوم ...بدلي ملابسه ونزليه ..."
رهف بضيق :" ان شاء الله يمه .."
بعد ما طلعوا من الصاله مسكت يد بسمه ودخلتها غرفة المكتب وسكرت البااااب....


&&&&&&&&&&&&&&&&&&&&&&&


-"تدرين اليوم انك بغيتي تفضحيني قدام ريم ..."
مشاعل : "عاد انتي ليش تخبين عنها .."
عبير :" يعنى ما تدرين ...هذي لو درت اكيد بتقول لاخوها ....ولو درى خالد ا نسي انه يفكر يتزوجني في يوم من الايام..."
مشاعل : "للحين ما فقدتي الامل..."
عبير : "ولا بفقده ...حتى لوخطب ...ما رح يتزوج الا انا ... عشان كذا كوني حذره قدام ريم ..."
مشاعل:"طيب واللي يخلي ريم تكلم شباب"
عبير:"مستحييييييل"
مشاعل :"وليش مستحيل.."
عبير:"احنا صحيح بنات خالات بس حياتي غير عن حياتها..."
مشاعل:"مشاء الله شرح وافي عزيزتي..... فهمت الحين.."
عبير:"هههههه يعني انا عادي اطلع متى مابغيت اكلم ولا احد يسأل من تكلمين بس هي مستحيل تطلع الامع امها او خالد او وحده من خواتها..."
مشاعل:"مالت عليك وتبغين تتركين هالحريه وتتزوجين واحد متشدد..."
عبير:"ياحبيبتي بيدي اخليه يتغير"
مشاعل:"مشكله الثقه الزايده...الحين خليه يرجع يخطبك مره ثانيه وعقب غيريه على كيفك..."
عبير:"بيخطبني مره ثانيه وبيكون لي ومستحيل اخلي وحد ثانيه تتهنى فيه(وهي تتنهد)...بس تصدقين اليوم كلمته وما عطاني وجه"
مشاعل:"معقووووله"
عبير:"بس اعرف خالد من متى يحبني ولا كلمني الا يوم ماخطبني مسوي فيها شريف وما يرضى علي الا مايرضاه على خواته"
مشاعل :"طلعنا عن موضوعنا المهم طيب واللي يخلي ريم تكلم شباب..."
عبير : "ياشيخه روحي ...هالشي مستحيل يصير"
...مشاعل وهي تفكر :" صدقيني مو مستحيل والايام بيننا ..."



********************************

-"وهذا هو الموضوع اللي بغيت اعرف رايك فيه ...."
بسمه وهي متفاجأه: "والله ما ادري بس انتي علشان تنقذيني من هالشايب... تعرضين علي الزواج من اخوك..."
بدريه: "يابسمه انا ماراح الاقي احسن منك زوجه لاخوي وبعدين انا فهمتك وضعه كيف....هو كان خاطب بنت خالتي بس زواجه منها صار مستحيل.."
بسمه:"اكيد هو قلبه لازال متعلق فيها..."
بدريه:"انا مااقدر اكذب عليك واقول لا...بس خالد بتزوج سواء كنتي انتي اوغيرك
وصدقيني مستحيل احصل لخالد احسن منك..."
بسمه:"خايفه يابدريه بموافقتي اظلمه معي..."
بدريه:"مااقدر ااثر على قرارك بس تأكدي ان خالد ماوافق الا لما صار عنده قبول لفكرة الزواج "
بسمه:"طيب بنت خالتك اللي تحبه احس حراااام يصير فيها كذا"
بدريه:"عبير بنت ماتفكر الافي نفسها وحبها لخالد لانه الافضل ولوكان لقت افضل من منه كان بسهوله تخلت عنه"
بسمه:" ما ادري احس اني في دوامه ماني قادره افكر..."
بدريه:"خذي وقتك....انا مااطلب ردك الحين انتي استخيري ربك واللي مرتاحه عليه سويه ولما توصلين لقرار قولي لي وصدقيني غلاك ما راح ينقص لوكان جوابك الرفض...."
وهي سرحانه: ا"ن شاء الله يصير خير ..."




*************************************************


بعد ما طلعت ام عبد العزيز وبناتها وبسمه ...
التفتت ام خالد لبتنها:"انتي متى بتتركين هالغرور والتكبر عنك ..."
ريم: "انا ما سويت شي عاملتهم عادي وبعدين انا ما احبهم ليش انافقهم ..."
ساره: "مو نفاق انك تعاملين الناس بادب واحترام حتى لو ما حبيتهم..."
ريم: "ما اقدر وبالذات هالبسمه اللي ماحبيتها ما ادري ليش ..."
امل: "اكيد غيرانه لانها احلى منك..."
ريم: "ما عنك ذوق ياعزيزتي اذا بسمه احلى مني ..."
رهف: "انا احبك ياخالتي بس حبي لك ما يمنع اقولك الحقيقه المره...بسمه احلى منك بكثير...."
ساره: "ههههههههههه تستاهلين لا تسبين بسمه في هالبيت ولا بيطلعونك برى .."
بدريه:ا"نتي يمه اشرايك في بسمه"
ام خالد:"ماشاء الله عليه بنت تنحب..."
ارتاحت بدريه لما سمعت رد امها ...




******************************************




قاعده في غرفتها....بعد ما صلت ركعتين الاستخاره...وتتحسب على عمها اللي حطها في هالموقف الصعب اليوم .مر اسبوع بعد ماكلمتها بدريه وهي مهي قادره تتخذ قرار
كان خالد مناسب لها لو ماكانت تعرف انه خاطب قبلها وفسخ الخطبه صار غصب عنه.
تنبهت على صوت عمها يناديها بصوت عالي ...
راحت تركض وهي في خاطرها الله يستر ...
ابو عبد العزيز : "ساعه لين تردين ..."
بسمه:" ما سمعتك عمي ...تآمر شي..."
ابو عبد العزيز : "اليوم عندي ضيوف على العشاء ...ادخلي المطبخ وساعدي الشغاله ابغى عشاء يبيض الوجه..."
وهو طالع: "سامعه ......."



************************************



هي اقرب اخونها لها كان يناظرها ويشوف الارهاق والتعب مبين في وجهها والدموع في عيونهابعد مادرت بحملها......
فهد:"العنود الله يهديك هذا شي من ربك وحرام تعترضين"
العنودوهي تتنهد من الاعماق :"استغفر الله...بس لا تلومني ياخوي..."
حط يده على كتفها:"ما الومك بس ترى الصبر يمدحونه..."
مسحت العنود دموعها :"فهد بغيت اسألك سؤال بس متردده..."
فهد:"ادري وش سؤالك....سألت عنه ومااحد يدري وينه...."
العنود:"الله لا يحرمني منك مااحد يفهمني غيرك.."
فهد:"ايه هذا انا الله يسلمك ذكي بالفطره"
العنود:"ذكي بالفطره...واللي كان ياخذ السنه بسنتين..."
فهد:"لازم يعني من الاحراااااج وبعدين انا كنت اخذ خبره في الدراسه...
العنود:هههههه "




******************************************
يتبع

وهي في المطبخ وتحاول قدر الامكان يكون كل شئ تمام ....ومن الاستعجال حطت ابريق الشاهي على رف المطبخ اللي كان مزحوم اغراض ....ومال الابريق بيطيح حاولت تمنع سقوطه بيدها بس لما حست يدها احترقت ما قدرت تتحمل فكت الشاهي وطاح على الارض ... كان عمها جاي ياخذ الشاهي لما سمع الصوت ...
شافها وهي جالسه وماسكه يدها وتبكي ....مسكها من شعرها وجرها بقسوه الين وقفت على رجلينها ....
ابو عبد العزيز : "انتي اش سويتي ..."
بسمه ودموعها في عينها : "عمي طاح الشاهي على الارض واحترقت يدي ..."
ابو عبد العزيز :" ليتك كلك احترقتي ..."
وعطاها كف على وجهها من قوته طلع دم من طرف فمها ...
ابو عبد العزيز وهو طالع: "كملي شغلك ... ولا تطلعين الين تخلصين ..."
نست الالم اللي في يدها والم الكف لان الالم اللي في قلبها غطى على كل الم ...
الشغاله والشفقه ظاهره في عيونها : "بسمه انتا في تأبان روووه ارتاه ..."
ما قدرت ترد عليها الا بهزه من راسها وقالت في خاطرها انتي رحمتيني وعمي اللي من لحمي ودمي مااشوف منه الا كل قسوه....
وراحت تكمل شغلها ....عقب العشاء ما طلعت الين خلص كل شي ...
اول ما طلعت كان الهدوء مخيم على البيت لان الجميع فوق ......
وطاح نظرها على التلفون ....اللي كانت تدوره ....دقت الرقم ويدها ترتجف ...وما اهتمت اذا الوقت متأخر ...
- "الو......."
ارتاحت اول ما سمعت صوتها ....
بسمه :"هلا بدريه...."

الجزء الثالث



كانت حاضره بجسمها وعقلها وتفكيرها في عالم ثاني...
دزتها امل من كتفها ..
امل :" الابله تسألك "
بسمه بشرود :"هااااا"
ابله شيخه : "اللي واخذ عقلك يتهنا به ...الظاهر ما انتبهتي لسؤال"
نزلت راسها وهزته ...حست ابلتها ان فيها شي لانه مو من عاداتها ...ولانها من اشطر طالبات فصلها....
ابله شيخه:" تعبانه يابسمه ..".
بسمه : "لا موتعبانه بس سرحت شوي "
ابتسمت لها :"خلي عنك السرحان انتي في ثالث ثانوي"
جلست وهي في اسوء حالانها امل ودلال حسوا ان بسمه فيها شي اجلو اسألتهم لها لما يطلعون...
رن الجرس وطلعوا البنات ...
راحوا مكان منعزل شوي حتى ياخذون راحتهم...
امل : "اشفيك بسمه احسك منتي طبيعيه "
بسمه بحزن : "ما فيني شي ..."
دلال :"بسمه مستحيل اكيد فيك شي ..."
تنهدت بسمه : "خلوها على الله الدنيا ماهي واسعتني من الضيقه..."
امل : "عسى ما شر ..."
بسمه بحزن :" الا الشر بعينه وعلمه "...خنقتها العبره وما قدرت تكمل...
سكتوا حتى هدت شوي ...ولما تمالكت نفسها مسحت دموعها ...
ولما خبرتهم بكل اللي صار رفعت عيونها الحزينه لهم ... :"عطوني حل اش اسوي بعمري..."
امل بتهور:" اهربي وروحي لخالتك..."
بسمه ابتسمت بحزن :"اهرب وين انتي عايشه ....وحتى لو هربت على قولتك بيصير مشاكل مالها اخر واللي بينتصر في الاخير عمي..."
امل:"الدنيا مهي فوضه....مافيه احد يزوج البنت غصب عنها..."
بسمه:"لا فيه كثييييييييير ياامل يزوجون بناتهم غصب عنهم ولااحد داري عنهم..."
امل : "يعني هو خلاص خطب ..."
بسمه : "حسب اللي سمعته هوكلمه قبل لا يسافر وبيرجع عقب شهر وبيصير كل شئ رسمي ..."
دلال : "يابسمه ما في يدينا شي نقدر نسويه وانت ما لك الا الكريم ...ولا تنسين ان باب الدعاء مفتوح ...ادعي ربك وهو قريب مجيب لدعاء عباده ولا تيأسي من روح الله.."
ارتاحت بسمه لكلام دلال ...
وابتسمت باسى : "ولله انك صادقه وانتو بعد لا تنسوني من دعاكم ...كلامك يادلال ينحط على الجرح يبرى ..."
ابتسمت امل :"وانا كلامي يزيد الجروح...."
بسمه :"اش دعوه انتي الخير والبركه...الله لايحرمني منك جميع..."



******************************
في الجامعه كانت عبير وريم وصديقتهم مشاعل مع بعض ...
عبير : "للحين ما تدرين من اللي بتكون خطيبة خالد "
ريم : "ما ادري للحين ......ما اتمنى احد يكون مرة اخوي الا انتي ..."
مشاعل اللي كانت عارفه كل شئ :"اخطبيني انا لاخوك ...شوفي اش ملحي ..."
عبير بغيره : "من زينك ..."
مشاعل مازحه :" انتي ليش تغارين ..."
عبير : "مشاااااعل ...ترى نفسيتي اليوم زفت"
مشاعل عشان تغير الموضوع : "ما سألتيني اش صار مع سعود"
عبير : "نسيت قولي اش صااار"
ريم : "لحظه ...لحظه انا صايره مثل الاطرش في الزفه اش السالفه ..."
مشاعل : "امس كنت انا وعبير في السوق ...وواحد رمى رقمه علينا ...واخذنا الرقم والبارح كلمته ....ياويل قلبي يازين صوته وسوالفه اللي تسحر ...."
ريم اللي ماشدها في الموضوع الا شي واحد : "عبير انتي تاخذين ارقام من شباب ..."
تفاجئوا ردت مشاعل عشان تنقذ صديقتها : "لا...عبير تقول اخلاقها ما تسمح ..."
ابتسمت ريم : "وهي صادقه وبعدين انتي مكالماتك ذي بتوديك في داهيه ..."
مشاعل : "اسكتي انتي واللي يعافيك ...انتي لوتجربين مره ...كان تنسين الملل اللي تشكين منه ..."
ريم : "لااااا انا مرتاحه في مللي بس انتي اللي ...."
مشاعل مقاطعه : "الموضوع كله تسليه ما يتعدى المكالماااات...."
هزت ريم راسها بعدم اقتناع..........


%%%%%%%%%%%%%%%%%

ان شاء الله تعجبكم القصه

يسلموو اختي على الطرح

**انوار الزهراء**

قصه راائعه جداا تسلمييين

على الطرح الجميل سلمت يمناك

على النقل والأبداعات الخلابه

تحياتي